Rabu, 18 Juli 2018

REVOLTA MANUFAHI HUSI PERSPETIVA TIMORIZASAUN*


Istória Timor-Leste durante períodu koloniál domina ho perspetiva portugeza (eurosentrizmu) ne'ebé fó importánsia liu ba akontesimentu sira kona-ba oinsá koloniál portugés ka olandés haluan nia podér no timoroan foin mensiona iha istória bainhira iha kontaktu ho koloniál sira. Iha períodu okupasaun indonézia istória Timor-Leste hakerek ho abordajen Estadu hodi lejítima polítika integrasaun, nune'e iha diferensa signifikante ho istória ne'ebé hakerek independentemente.

Basá istória nia kontribuisaun krusiál ba konstrusaun identidade nasionál estadu-nasaun Timor-Leste nian, presiza hatuur produsaun istoriográfika husi timoroan nia perspetiva rasik nein perspetiva portugeza no perspetiva indonézia. Ne'e-duni relevante tebes hodi buka tuir oinsá timoroan hahú interpreta sira-nia tempu pasadu husi perspetiva timorizasaun. Eskrita ida-ne'e foka ba oinsá nasionalista timoroan interpreta no reinterpreta Revolta Manufahi tinan 1912 no oinsá lider revolta Dom Boaventura hetan konsiderasaun nu'udar eroi nasionál iha tempu istóriku Timor-Leste nian. Nune'e la haktuir lala'ok kona-ba Revolta Manufahi, maibé bazeia ba Daniel de Lucca Reis Costa ninia teze A Timorização do Passado: nação, imaginação e produção da história em Timor-Leste (2016), oinsá timoroan hatuur revolta ne'e husi perspetiva timorizasaun ho matan etnográfiku iha área antropolojia istória halo analiza ba leitura, imajen, monumentu no selebrasaun sentenária Revolta Manufahi tinan 2012.[1]

Perspetiva Timorizasaun    

Diskusaun kona-ba perspetiva timorizasaun hahú depois Revolusaun Ai-funan Kravu tinan 1974. Ida-ne'e la sees husi prosesu deskolonizasaun ne'ebé tardiu. Portugál nu'udar país koloniál hetan krítika husi komunidade internasionál ne'ebé rezulta nia kolónia sira-nia estatutu muda ba 'provínsia ultramarinha' iha tinan 1951. Ne'e-duni hodi hametin nia podér, dalan polítika ida maka sadere ba teoria Luso Tropicalismo katak eduka povu kolonizadu sira atu bele imajina an nu'udar sidadaun portugeza no kultura portugeza maka di'ak liu, tan iha armónia rasiál no integrasaun étnika nu'udar karaterístika únika importante ida.[2]

Prosesu sira-ne'e implika reformasaun ekonómika iha kolónia áfrika sira maibé la evita Funu Libertasaun ne'ebé povu afrikanu sira lansa hori dékada 1960. Situasaun ne'e kontradís ho Timor-Portugés ne'ebé kuaze hakmatek, dook husi Áfrika no izoladu husi ninia rejiaun. Maski nune'e elite timoroan iha Dili hahú enkontru anti-koloniál ho klandestinu, hahú polémika iha jornál kona-ba vida sosiál iha kolónia no husi matan timoroan nian ho sentimentu nasionalista koko hodi krítika ka defende kultura timór nian. Mezmu sira-nia diskursu seidauk to'o étapa ida-ne'ebé define loloos perspetiva timorizasaun nu'udar konseitu ida.

Bainhira deskolonizasaun sai governu portugés nia polítika ofisiál iha tinan 1974, liafuan timorizasaun foin sai vokabuláriu importante ida, prinsipalmente ba kontekstu timorizasaun iha setór edukasionál maka hala'o husi GCRET (Grupo Coordenador Para a Reformulação do Ensino de Timor) ho objetivu halibur manorin no jestór eskola sira hodi revee programa no manuál sira, hanoin filafali (repensar) sistema edukasionál hodi sujere buat foun ne'ebé kondizente ba nesesidade no realidade timoroan nian.[3] Maibé polítika ne'e la implementa tan interferénsia okupasaun militár indonézia iha tinan 1975. Nune'e, governu okupasaun introdús istória tuir perspetiva Rejime Orden Foun liuhosi prosesu indonezianizasaun atu timoroan bele simu polítika integrasaun.[4]

Maibé perspetiva timorizasaun hahú utiliza nu'udar krítika ne'ebé opoin istoriográfia koloniál iha diáspora. Intelektuál timoroan hanesan Abílio Araújo mezmu utiliza fonte koloniál hakerek As Elites em Timor (1973) no Os Loricos Voltaram a Cantar (1977), interpreta Timor-Leste nia pasadu husi perspetiva nasionalista. Maski nune'e durante okupasaun indonézia (1975-99) obra rua ne'e sirkula limitadu iha Timor-Leste ho polítika represiva la fó espasu hodi diskute perspetiva timorizasaun.

Konseitu timorizasaun foin mosu fali nu'udar diskursu interpretativu no hetan redefinisaun ho mudansa signifikativa hafoin restaurasaun independénsia tinan 2002. Daniel de Lucca konklui timorizasaun iha kontekstu ne'e maka 'dekolonizasaun', partikularmente ho signifikadu hanesan 'deportugalizasaun', 'deindonezianizasaun', no refere relasaun entre Timor-Leste ho Nasoins Unidas inklui ajénsia internasionál oioin;[5] katak  'nasionalizasaun' kona-ba asuntu Timor-Leste. Konseitu ida-ne'e sai fundasaun teórika hodi analiza oinsá repezentasaun Revolta Manufahi tinan 1912 iha timoroan nia matan, vis-à-vis ho istoriografia koloniál no reprezentasaun Dom Boaventura durante okupasaun indonézia.

Revolta Manufahi husi perspetiva portugeza

Iha perspetiva hirak kedas relasiona ho istoriografia kona-ba Revolta Manufahi (1911-1912), maibé eskrita ne'e foka liu ba perspetiva portugeza no indonézia. Biar nune'e la hasees perspetiva franseza ka anglófona ne'ebé esensiál hodi hariku no hatuur istoriografia ida-ne'ebé krítiku ho perspetiva timorizasaun. Daniel de Lucca (2016) konklui husi perspetiva hirak ne'ebé eziste, exetu la mensiona perspetiva indonézia nian kuaze iha konsensu ida katak rohan husi Funu Manufahi nu'udar pontu nakfilak ba forma oinsá hala'o podér iha territóriu.

Perspetiva portugeza haktuir katak fin husi Revolta Manufahi nu'udar faze importante ida tanba konsege harahun liurai sira-nia podér, hafahe reinu sira ba unidade ki'ik atu fasil hodi kontrola. Se iha liurai ida-ne'ebé mantein nia pozisaun, ida-ne'e mai husi liurai sira ne'ebé leál ba Portugál. Konsekuénsia seluk maka liurai ho dato revoltozu sira lakon direitu ba rai, animál hakiak ne'ebé sei moris sai rikusoin estadu nian no haruka família timoroan barak nu'udar atan ba fatin seluk iha Timór hodi obriga halo serbisu asuliar nian. Tuir ne'e governadór koloniál mós halo kodifikasaun foun ba lejislasaun lokál ne'ebé obriga ema serbisu ho morál no legál. Ne'e-duni derrota Dom Boaventura iha Funu Manufahi bele konsidera nu'udar fin husi sistema polítiku reinu Timór nian no hahú administrasaun direta ne'ebé konsolida Pax Lusitana.[6]

Husi perspetiva portugeza manán-na'in Funu Manufahi hanesan governadór Filomeno da Câmara (1911-1917) ho nia aliadu sira, liuliu Dom Carlos husi Alas no Dom Aleixo Corte Real husi Ainaro ne'ebé subjuga Dom Boaventura merese hatuur iha fatin onradu. Ida-ne'e hatudu iha espozisaun koloniál tinan 1934 iha Portugál, bainhira oan husi Dom Aleixo, Adriano Corte Real lee diskursu iha lia-portugés hodi hahii no rekoñese méritu sivilizasaun luzitana ne'ebé hamamar rebelde sira, domestika domin ba funu no hanetik asuwain sira hananu 'lorsa' ne'ebé hanaran funu timoroan nian.[7]    

Dom Aleixo Corte Real konsidera nu'udar eroi ultramar ne'ebé konsagradu ho martir ba patria luzitana nian. Haree nia méritu tanba foti kro'at hodi reziste, hafoin hetan oho husi forsa nipónika ne'ebé okupa illa Timór durante Funu Mundiál Daruak. Bainhira japonés sira rende tanba bombardeamentu atómiku la'ós tan forsa Aliadu nian manán funu iha Timór, ikusmai podér portugés hatuur filafali iha tinan 1946 no Dom Aleixo hetan títulu póstumu Comendador da Ordem Honorífica Portuguesa Torre e Espada. Konsidera nu'udar régulu ne'ebé fiél ba bandeira portugeza; koñesidu nu'udar timoroan dahuluk ne'ebé ninia foto reprezenta iha osan (moeda); harii ninia monumentu iha Ainaro; timoroan dahuluk ne'ebé hakerek nia biografia no tematizadu iha livru didátiku istória nian iha Portugál, nune'e liurai difinitivamente integra iha istoriografia poténsia kolonizadora nian.[8]

Naran no imajen Dom Aleixo Corte Real espalla to'o koñesidu iha metrópole nu'udar liurai timoroan ezemplár ida no mós ohin loron hetan prestíjiu boot liután nu'udar eroi mitolojia luzotropikál nian.[9] Kontráriu ho ida-ne'e dignidade Dom Boaventura nu'udar régulu Manufahi hasai husi patente koronél no hetan reprezentasaun antagónika: liurai traidór, selvajen no rebelde ne'ebé presiza pasifika. Rivalidade entre liurai rua ne'e kontinua durante Funu Mundiál Daruak, kuandu liurai sira maktuir liurai Manufahi nian luta husi japonés sira no Dom Aleixo ho ninia asuain sira funu husi Aliadu australianu sira.

Abílio Araújo no perspetiva nasionalista

Iha dékada 1970, foin hahú narrasaun istórika kona-ba Funu Manufahi hakerek husi perspetiva timoroan nian. Kontradís ho perspetiva portugeza, nasionalista timoroan hahú fó apresiasaun no omenajén ba Dom Boaventura. Imajen Dom Boaventura husi album portugeza iha Exposição do Mundo Português, iha Lizboa tinan 1940, timoroan prodús filafali no ulukliu utiliza iha kapa livru As Elites em Timor hakerek husi Abílio Araújo iha tinan 1973 ho nota iha imajen okos: “Dom Boaventura Manufahi, xefe revolta tinan 1912, hetan bolun 'traidór' no 'rebelde' husi koloniál portugés tanba lakohi nafatin atu lia-ida”, no iha nota rodapé hakerek, “Dom Boaventura liurai Manufahi no xefe boot revolta hasoru kolonializmu portugés tinan 1912. Liuhosi paktu juramentu raan konsege halo aliansa ho liurai timoroan hotu. Maibé bainhira hamosu revolta, ema balun trai nia.”[10]

Obra As Elites em Timor hakerek ho pretensaun polítika duké akadémika, Abílio komesa haree Timor-Leste nia pasadu husi perspetiva timorizasaun. Iha ninia interpretasaun istórika kona-ba elite timoroan nian, konsidera liurai no dato sira nu'udar elite timoroan husi primeira jerasaun hafoin hahú inkorpora ba sistema koloniál, liutiha derrota iha funu anti koloniál sira durante 'guerra de pacificação', husi sékulu XIX ba sékulu XX. Ida-ne'ebé Dom Boaventura nakfila ba reprezentasaun másima husi jerasaun elite dahuluk maka rekuza aliansa ho bandeira portugeza.  

Entretantu iha livru Timor-Leste – Os loricos voltaram a cantar – das guerras independentistas à revolução do povo maubere (1977), Abílio aviza katak materiál ne'ebé nia konsulta, prodús husi perspetiva vensedór no koloniál ninia interese, tan ne'e presiza iha timoroan nia óptika interpretativa no espíritu krítiku. Inklui mós nia kestiona periodizasaun istórika ne'ebé portugés sira halo katak hili tuir vizaun istórika koloniál nian. Nune'e, estabelese períodu sira tuir data ne'ebé hamosu triunfu ba portugés sira-nia arma ka pasu hodi hametin sira-nia territóriu.[11]

Títulu Os loricos rasik foti husi manu ne'ebé barak iha foho Timór, katak loriku nia silénsiu asosia ho Dom Boaventura nia derrota iha Funu Manufahi no bainhira loriku hananu fali, ida-ne'e liga ho movimentu nasionalista timoroan husi FRETILIN (Frente Revolucionária de Timor-Leste Independente) ne'ebé hahú mosu filafali. Loriku simboliza no reprezenta povu ne'ebé laiha voz ho joven movimentu nasionalista sira ne'ebé tuir ain-fatin Dom Boaventura nia luta hasoru kolonializmu.

Papél Abílio fundamentál iha prosesu fó koñese filafali sé maka Dom Boaventura liuhosi imajen ne'ebé tau iha ninia livru nia kapa, nune'e mós nia interpretasaun kona-ba Revolta Manufahi husi perspetiva timorizasaun. Dom Boaventura nia luta ne'ebé ema rona de'it iha oralidade, ho prezensa Abílio nia livru konsege inkorpora liurai asuwain ba pensamentu nasionalista timoroan sira no ikusmai hetan aseitasaun populár.

Bazeia ba Abílio nia publikasaun ne'ebé divulga Dom Boaventura, ikusmai konsidera nu'udar eroi nasionál husi movimentu nasionalista timoroan sira. FRETILIN iha ninia kampaña polítika mobiliza didi'ak istória kona-ba Dom Boaventura no Revolta Manufahi iha ninia diskursu sira katak timoroan tenke unidu no fó onra ba luta iha pasadu kontra kolonializmu. Ida-ne'ebé simboliza mós husi Komisaun FRETILIN ida organiza joven nasionalista sira husi Dili ba vizita feto-faluk Dom Boaventura iha suku Kakuit Same tinan 1974.

Entre vizitante sira, ida maka José Ramos-Horta ne'ebé iha loron 12 fulan-abríl tinan 1976 nu'udar Ministru Negósiu Estranjeiru husi Repúblika Demokrátika Timor-Leste iha ninia diskursu ba Konsellu Seguransa ONU (Organização das Nações Unidas) nian, hatete ho orgullu katak Rainha Maria de Manufahi, feto-faluk Dom Boaventura nu'udar militante husi partidu ne'ebé nia reprezenta.[12]

Dom Boaventura husi perspetiva Indonézia

Governu indonéziu durante períodu okupasaun militár, koko atu hakerek filafali istória Timor-Leste. Husi tinan 1975 ba kotuk, istória indonézia nian nunka mensiona Timor-Leste nu'udar parte integrante territóriu indonéziu nian maibé ida-ne'e kebra tiha ho impozisaun prematura liuhosi livru Integrasi: Kebulatan Tekad Rakyat Timor-Timur (1976), tinan ida depois invazaun.

Argumentu balun ne'ebé istória versaun Orde Baru - Indonézia koko hatuur maka halo liña-konesaun ba períodu Srivijaya (sékulu 7-14) no períodu Majapahit (sékulu 13-15) ho anakronikamente hatuur nu'udar 'estadu-nasionál' uluk iha Nusantara, katak Repúblika Indonézia hetan erdeiru husi impériu rua ne'e nia fronteira jeográfika. Tan ne'e integrasaun Timor-Leste hanesan 'territóriu' ne'ebé fila hikas ba Ibu Pertiwi (Mãe Pátria); no hatuur similaridade entre Timor Osidental nu'udar kolónia olandeza ho Timor-Leste nu'udar kolónia portugeza hodi enfatiza katak territóriu rua ne'e koloniza husi nasaun osidentál hafoin konsege hafahe reinu Timór sira.

Iha kontestu ida-ne'e governu okupasaun indonézia koko atu foti mós imajen Dom Boaventura nu'udar símbolu liurai ne'ebé luta kontra kolonializmu hodi lejítima polítika integrasaun. Mezmu la ofisializa nu'udar eroi nasionál indonézia nian, maibé imajen Dom Boaventura maizumenus hatuur hamutuk iha pozisaun iguál ho eroi pré-nasionalista indonézia nian ne'ebé luta hasoru koloniál olandés.[13]

Daniel de Lucca nia estudu kona-ba monumentu Dom Boaventura nian durante períodu okupasaun nian, haktuir katak maizumenus ba perpetuasaun pasadu liuhosi monumentu, governu indonéziu harii monumentu tolu hodi lejítima polítika integrasaun. Monumentu ida importante liu maka estátua Dom Boaventura iha Jardín 5 de Maio Dili ho hatais tradisionál tau belak no kaibauk, hatudu asuwain ida-ne'ebé dada kotuk korrente iha ninia liman no ain nune'e bele interpreta nu'udar jestu libertasaun nian hodi hasoru domíniu koloniál. Estátua ne'e iha dékada 1980, sai íkonu ida ba sidade Dili ne'ebé baibain utiliza ninia retratu iha kapa livru sira kona-ba Timor-Timur, inklui istória ofisiál kona-ba integrasaun, kona-ba dezenvolvimentu to'o panfletu ka publikasaun propagandístika sira seluk.[14] Maizumenus liuhosi estátua ne'e, governu indonéziu koko halo afirmasaun kona-ba valór universál tradisaun pasadu pré-koloniál ne'ebé luta hasoru kolonializmu iha rejiaun Sudeste Áziatiku.[15] 

Iha kontekstu ne'e imajen Dom Boaventura la hatuur ona iha fatin sentrál husi parte rezisténsia atu mobiliza luta kontra okupasaun indonézia. La hanesan ho diskursu inagurál nasionalizmu timoroan ne'ebé foti aas revolta populár ho frontalidade radikál no luta anti-koloniál, entaun aspetu ne'ebé reprezenta ho di'ak kona-ba figura Dom Boaventura iha dékada 1980 maka reinventa narrativa nasionalista, elabora ho diskursu afirmativu ida hodi buka pás la'ós konflitu. Nune'e, bele harii narativa anti-indonézia ida ne'ebé bele alkansa no envolve timoroan barakliu nomós aliadu esternu sira. Iha konfigurasaun foun ida-ne'e, figura Dom Boaventura la korresponde ona ba nesesidade no aspirasaun koletiva sira husi timoroan nian, mezmu iha fatin dook diáspora.

Oinsá mós perspetiva indonézia kona-ba Revolta Manufahi presiza haree arkivu indonéziu nian, inklui mós husi jornál lokál sira ne'ebé públika iha Dili dékada 1990 nian. Relasiona ho sujestaun husi governu provínsia Timor-Timur nian ne'ebé maioria husi APODETI (Associação Popular Democrática Timorense), atu Dom Boaventura hamutuk lider APODETI hanesan Osorio José Soares no Arnaldo dos Reis Araújo sai eroi nasionál indonézia nian. Naran ikus nu'udar fundadór APODETI tinan 1975 no governadór dahuluk períodu okupasaun (1976-78), hakoi iha Jardín Eroi Nasionál Seroja.[16] Iha kedas semitériu Santa Cruz nia sorin iha-ne'ebé tuir istória balun husi ibun ba ibun katak Dom Boaventura hakoi iha ninia entrada atu ema hotu bele sama, katak simbolikamente hatún nia dignidade.[17]

Pós Independénsia

Dom Boaventura mosu filafali iha panteaun nasionál, depois Timor-Leste restaura independénsia. Prinsipalmente hatudu iha serimónia selebrasaun tinan 100 Revolta Manufahi ne'ebé hala'o iha Same, koloka mós estatúa monumentál Dom Boaventura bazeia ba imajen ne'ebé utiliza dala uluk iha kapa livru Os Loricos. Nune'e, imajen Dom Boaventura hahú sai boot no bele hetan iha faru, boné, postér, kapa livru no ida importante liu maka moeda timoroan nian ho valór 100 Centavos ho imajen Dom Boaventura.[18] Ida-ne'ebé bazeia ba Benedict Anderson nia estudu bele funsiona nu'udar emblema poderoza sira ba dezenvolvimentu ho sentimentu nasionál. Nune'e reprodusaun hirak-ne'e hasees sentralidade monumentu antropomórfiku sira-ne'ebé governu okupasaun indonézia harii iha lokalidade estratéjika balun.

Entretantu perspetiva timorizasaun mós ita bele haree oinsá governu RDTL (República Democrática de Timor-Leste) fó fatin sentrál ba Dom Boaventura nu'udar eroi nasionál duké Dom Aleixo Corte Real. Se governu períodu koloniál Portugál harii estátua Dom Aleixo Corte Real iha Ainaro, entaun governu RDTL harii estátua Dom Boaventura hodi komemora tinan 100 Revolta Manufahi iha Same; se imajen Dom Aleixo Corte Real tau iha osan eskudu 100, entaun Dom Boaventura tau iha osan centavos 100; se ida primeiru hatuur iha materiál didátiku istória portugeza nian iha períodu liutiha funu koloniál, entaun Dom Boaventura hahú introdús iha materiál didátiku istória nian ne'ebé timoroan prodús. Nune'e mós Dom Aleixo Corte Real nu'udar timoroan dahuluk ne'ebé ninia biografia portugés ida maka hakerek, entaun ohin loron hahú iha istória sira ne'ebé konta, hakerek no públika kona-ba Liurai Manufahi; Dom Aleixo hetan títulu husi governu koloniál entaun Timor-Leste independente hahú tinan 2007, entrega Ordem Dom Boaventura nu'udar Ordem Combatentes Fundadores de Libertação Nacional.[19] Nune'e mós tinan 2015 toponímia dalan, Rua Dom Aleixo Corte Real iha área Mandarin (Dili) hori tempu portugés troka ba Rua Dom Boaventura.[20]

Dom Boaventura nu'udar aman nasionalista?

Liutiha ka durante Sentenáriu Revolta Manufahi iha Same (1912-2012) ho produsaun narrativa istórika ne'ebé limitadu, dala balun ita rona afirmasaun Dom Boaventura nu'udar 'fundador da nação', ka bainhira vizita Rádiu komunitáriu Same tinan 2012, hetan retratu boot Dom Boaventura tara iha didin ho nota 'aman nasionalista Timor-Leste' nian. 

Oinsá mós atu liga movimentu nasionalizmu ho Revolta Manufahi, presiza haree ho kuidadu. Uluknain istóriadór fransés René Péllisier maka haree kritikamente ba fonte sira-ne'ebé relasiona ho Funu Manufahi no aprezenta razaun hirak ne'ebé posível. Tuir nia, razaun ida korrente liu ba Revolta Manufahi mak iha nia orijén antikoloniál ho feisaun proto-nasionalista, haree ba posibilidade partisipasaun husi indivíduo asimiladu balu (funsionáriu timoroan no mestisu), soran ho rejime repúblikanu foun no liga ho Loja Masonika 'Oceania' ne'ebé harii iha Dili tinan 1911.[21] Diferensa ho ninia aman Dom Duarte Souto Maior ne'ebé hakarak reziste de'it, entaun nia oan Dom Boaventura hakarak duni sai tiha portugés sira; ketak ho liurai nia oan sira uluk, Dom Boaventura iha orizonte luan nu'udar estudante iha Koléjiu Misaun Lahane iha tinan 1895, hafoin kaptura husi povu manufahi ne'ebé haruka rasik husi ninia aman, no ikusmai eleitu nu'udar régulu.

Nune'e mós durante Funu Manufahi iha iluzaun igualitária husi asimiladu sira-ne'ebé hakarak aproveita implantasaun Repúblika iha tinan 1910 no ba liurai timoroan sira haree ida-ne'e nu'udar oportunidade atu harii aliansa. Liuliu liurai sira ne'ebé lakon lasu monárkiku, la kontente ho transformasaun no kontrolu administrativu hanesan: haboot impostu kapitasaun, monetarizasaun fiska nian ho 'pataka', obrigasaun serbisu ba obra públika nian, resenseamentu obrigatóriu ba populasaun, animál-haki'ak no ai-horis, prezensa Olanda ne'ebé hamosu filafali krítika hodi soran ka sadik konflitu ho Portugál no mudansa bandeira monárkika ho republikana nian. Ida-ne'ebé bandeira monárkika hatudu símbolu aliansa klase dato ho koroa Portugál nian.[22] Insatisfasaun husi líder sira ne'ebé hakotu nia aliansa, ikusmai hamutuk iha Funu Manufahi maka foti aas liu Dom Boaventura. Bainhira reinu Manufahi iha kosta-súl konsege halibur xefetura sira to'o iha parte tasi-feto no enklave Oécussi-Ambeno. Represaun koloniál partikularmente dura to'o nesesita ró-funu ho tropa sira husi Índia, Makau no Mosambike. Nune'e mós ema timoroan entre 15 mil to'o 25 mil sai vítima, ka liu 5% husi populasaun.[23]  

Relasiona ho koñesimentu liurai sira kona-ba 'independénsia' ka 'nasionalidade', Geoffrey Gunn halo komparasaun ida maibé la afirma katak Funu Manufahi hanesan ho Revolução Haitiana nu'udar únika luta ba dekolonizasaun iha rohan sékulu da-20, bainhira atan sira-nia revolta lidera husi intelektuál nasionál foti fila retórika koloniál kona-ba liberdade, igualdade no demokrasia hodi kontra na'i koloniál sira.[24] Ida-ne'e kuaze hatán malu ho Abílio Araújo nia palestra ba I Conferência Internacional Memória e Identidade Nacional katak konsepsaun moderna estadu-nasaun la han malu ho objetivu husi régulu nia luta kontra kolonializmu portugés. Abílio haforsa tan iha ninia entrevista katak Dom Boaventura nu'udar ema ida-ne'ebé kontra korrente istóriku hodi halibur liurai sira; nu'udar eroi ida, mas tanba limitasaun la hatene sistema koloniál ne'ebé iha faze avansada liu; mas la'ós Dom Boaventura maka harii nasaun, karik liafuan ne'e mós nia la koñese; nia ezemplu ida, inspirasaun ida, mas la'ós kriadór nasaun.[25]

* Aprezenta iha aniversáriu Centro Nacional Chega (CNC), loron 17 fulan-jullu tinan 2018.

Nota de rodapé

[1] Rejistu istória kona-ba Timor-Leste ho abordajén konvensionál fó importánsia liu ba dokumentu eskritu, lahó abordajén etnográfika no antropolójika sei ignora tradisaun istória oral ne’ebé haktuir ho riku kona-ba vida timoroan nian iha pasadu. John G. Taylor. 1998. Perang Tersembunyi: Sejarah Timor-Timur yang dilupakan. Jakarta: Fortilos. p. 1.
[2] Helen Mary Hill. 2000. Gerakan Pembebasan Nasional Timor Lorosae. Dili. Yayasan HAK & Sahe Institute for Liberation. p. 33-34. 
[3] Haree António Barbedo de Magalhães. 2016. 'To think about the school and its issues is a right and a duty': Decolonizing the education system in East Timor in 1975', iha Timor-Leste: O local, regional e global. Volume II. Timor-Leste Studies Association.
[4] Rogério Sávio Ma’averu, 2018. A “timorização” da história: pesquisa histórica e produção de manuais didáticos’. Semináriu online iha (CES) Centro de Estudos Sociais - Universidade Coimbra no CLACSO (Conselho Latino-Americano de Ciências Sociais). Haree vídeo aprezentasaun iha https://youtu.be/lkvfQas_qdA. 
[5] Daniel de Lucca R. Costa. 2016. A timorização do Passado: nação, imaginação e produção da história em Timor-Leste. Tese Doutoramento. Unicamp. p. 91-95. Kona-ba relasaun Timor-Leste ho Nasoins Unidas no Ajénsia Internasionál oioin haree, Kelly Silva, 2012, As Nações Desunidas – Práticas da ONU e a estruturação do Estado em Timor-Leste. Belo Horizonte. UFMG.
[6] Daniel de Lucca Reis Costa. 2016. A timorização do Passado: nação, imaginação e produção da história em Timor-Leste. Tese Doutoramento. Unicamp. p. 154.
[7] Ibid. 162.
[8] Ibid. 163.
[9] Haree iha Nota Rodapé,  ibid. p. 68. 
[10] Ibid. p. 165.
[11] Periodizasaun ne'ebé Abílio propoen maka: 'o primeiro período que vai de 1642 a 1912 e o segundo período que compreende ao intervalo medido entre 1912 e 1975. O 1º período corresponde às duras 'guerras independentistas' travadas pelos Povos Timores que queriam continuar a escrever livremente a sua história. O 2º período corresponde à fase de resistência passiva generalizada quebrada por inssurreições contra o colonialismo português – o movimento camponês que eclodiu durante a Segunda Guerra Mundial, apelidado pelos portugueses de “colunas negras” e a revolta de 1959 – período de anúncio da formação da nova nacionalidade Timor e do surgimento do movimento de libertação nacional dirigido pela direção única e que teria o desfecho com a proclamação da República Democrática de Timor- Leste. (1977:66-67).' Geoffrey Gunn, (1999), iha ninia livru Timor Lorosa'e: 500 years fó krítika ba periodizasaun husi Abílio Araújo katak simplista demais.
[12] Geoffrey C. Gunn. 2005. 500 Tahun Timor Loro Sae. Dili. Sa’he Institute for Liberation (SIL) & Nagasaky University. p. 276.
[13] Dékada 1990, governu indonéziu publika istória ofisiál ba nivel SMU (Sekolah Menengah Umum) ka sekundáriu kona-ba integrasaun ne'ebé mensiona mós Revolta Manufahi, mezmu nunka uza hodi hanorin iha aula. Iha biblioteka CNC (Centro Nacional Chega) no Xanana Reading Room livru ne'e nein iha kópia ida.
[14] Estátua daruak hamriik iha Meskita Fatuhada embaixada australiana nia kotuk. Estátua ida-ne'e iha tinan 1998 governu provínsia Timor-Timur hameno atu tau iha rotunda aeroportu Comoro ne'ebé ohin loron tau estátua Nicolau Lobato, maibé abandonadu tanba situasaun runguranga depois referendu 1999. Nune'e populasaun Fatuhada foti hodi tau iha sira-nia bairru. Estátua datoluk harii iha Same iha rejiaun ne'ebé Dom Boaventura lansa funu iha tinan 1911, maibé husi aspetu fíziku nia oin no hatais la'ós hanesan asuwa’in timoroan ida, maibé atu hanesan fali eroi ibérika.
[15] Pseudónimu Dadolin Murak nia poema iha lia-indonézia ho títulu ‘Jenerál’ (25/09/2017), versu iha estrofe daruak: Jenerál/Boaventura no Nicolau Lobato tabú atu ami temi/Ó obriga ami atu dekór eroi revolusaun hitu/... Se haree didi'ak governu indonéziu mezmu deskreve Lobato nu'udar kriminál, maibé ida-ne'e la akontese ba Dom Boaventura ne'ebé konsidera nu'udar eroi lokál iha luta hasoru kolonializmu portugés. Asesu ikus ba poema iha Facebook, loron 12 fulan-abríl tinan 2018.
[16] Se la sala iha dékada 1990, Dom Boaventura nomeia husi governu provínsia nian nu'udar eroi nasionál ne'ebé luta hasoru prezensa kolonializmu hodi reprezenta Timor-Timur hanesan provínsia indonézia sira seluk.
[17] Ípoteze balu ba Dom Boaventura nia fatin prezu no enterradu maka lori ba kadeia Aipelo (Bazartete), prezidiu ba Balibó, Batugadé no ba illa Ataúro. Versaun seluk dehan prezu iha mota Klere nia ninin entre Alas ho Fatuberliu hafoin mai Dili, ba Balibó hafoin troka ba garrafaun aguardente hodi lori ba Soe (Timor Osidental), hola oan feto liurai Hal-Tama iha Noemuti no ikusmai mate hakoi iha ne’ebá. Haree Dom Carlos Filipe Ximenes Belo, A Guerra de Manufahi (1911-1912). Baucau. 2012. p. 24
[18] Kestaun refletiva ida-ne'ebé Daniel de Lucca mensiona maka estátua Dom Boaventura halo iha Bandung (Indonézia) no moeda/osan centavos iha Casa Moeda Portugál nian. Ida-ne'e hatudu dependénsia ba eis-metropóle ba reprodusaun eroi nasionál. Imajen ka estátua Dom Boaventura bazeia ba foto ne'ebé koloniál portugés prodús ho pose tuur, ho arma no faru asuwa’in timoroan nian ba nesesidade Espozisaun Koloniál iha Lizboa.
[19] Orden ida-ne’e ba Combatentes Fundadores do Movimento de Libertação Nacional ne’ebé promove, organiza no lidera rezisténsia entre loron 15 fulan-agostu 1975 no loron 31 fulan-maiu 1976. Haree Rogério Ma'averu Sávio. 2012. Revolta Dom Boaventura iha Manufahi (1911-1912). Dili. Comissão Organizadora Centenário Revolta Manufahi. p. 9.
[20] http://observador.pt/2015/10/30/timor-leste-novos-nomes-as-ruas-dili/
[21] Haree René Pélissier. 2007. Timor em Guerra: A conquista Portuguesa 1847-1913. Lisboa. Editorial Estampa. P. 434-438. Geoffrey Gunn, op. cit. 267-268.
[22] Geoffrey Gunn, op.cit. 267.
[23] Frédéric Durrand. 2009. História de Timor-Leste: Da Pré-História À Actualidade – Istória Timor-Leste Nian: Husi Pre-Istória To’o atualidade. Lisboa-Porto. Lidel. p. 56.
[24]  Geoffrey Gunn, op.cit. p. 27. 
[25]  AMRT. 2015. Memória e Identidade Nacional. Dili, 26 e 27 de Janeiro de 2015. p. 74. 

BIBLIOGRAFIA

AMRT.
2015. Memória e Identidade Nacional. Dili, 26 e 27 de Janeiro de 2015.

Araújo. Abílio.
            1973. As Elites em Timor. Lisboa.

Belo. Dom Carlos Filipe Ximenes.
            2012. A Guerra de Manufahi (1911-1912). Baucau.

Costa. Daniel de Lucca Reis
2016. A timorização do Passado: nação, imaginação e produção da história em Timor-Leste. Tese Doutoramento. Unicamp.

Durrand. Frédéric.
2009. História de Timor-Leste: Da Pré-História À Actualidade – Istória Timor-Leste Nian: Husi Pre-Istória To’o atualidade. Lisboa-Porto. Lidel.

---------------
2010. Timor-Leste: País no Cruzamento da Ásia e do Pacífico. Um Atlas Histórico-Geográfico. Lisboa-Porto. Lidel.

Gunn. Geoffrey C.
2005. 500 Tahun Timor Loro Sae. Dili. Sa’he Institute for Liberation (SIL) & Nagasaky University.

Hill. Helen Mary.
2000. Gerakan Pembebasan Nasional Timor Lorosae. Dili. HAK & SIL.

Ma'averu. Rogério Sávio
2012. Revolta Dom Boaventura iha Manufahi (1911-1912). Dili. Comissão Organizadora Centenário Revolta Manufahi.

---------------
2018. A “timorização” da história: pesquisa histórica e produção de manuais didáticos’. Semináriu online CES (Centro de Estudos Sociais) - Universidade Coimbra no CLACSO (Conselho Latino-Americano de Ciências Sociais). Vídeo iha https://youtu.be/lkvfQas_qdA 

Magalhães. António Barbedo de.
2016. 'To think about the school and its issues is a right and a duty': Decolonizing the education system in East Timor in 1975', iha Timor-Leste: O local, regional e global. Volume II. Timor-Leste Studies Association.

            Observador.
                         2015. Timor-Leste novos nomes para as ruas de Díli.

Pélissier. René.
2007. Timor em Guerra: A conquista Portuguesa 1847-1913. Lisboa. Editorial Estampa.

Silva. Kelly.
2012, As Nações Desunidas – Práticas da ONU e a estruturação do Estado em Timor-Leste. Belo Horizonte. UFMG.

Soekanto
1976. Integrasi: Kebulatan Tekad Rakyat Timur-Timur. Jakarta. Yayasan Parikesit.  
           
Taylor. John.
1998. Perang Tersembunyi – Sejarah Timor Timur Yang Dilupakan. Jakarta. Fortilos.  

Tidak ada komentar:

Posting Komentar