Minggu, 22 April 2018

HAHUSUK TRABALLADÓR IDA NE'EBÉ LEE (BERTOLT BRECHT - tradusaun)

Sé maka harii Tebas ho odamatan hitu?
Iha livru imi hetan naran liurai sira:
Maibé sira maka dada fatuk kafuak boboot?

No Babilónia ne'ebé harahun dala hira
Sé mak harii fila fila?

Ida falun osan-mean iha Lima, nia konstrutór sira horik iha ne'ebé?
Pedreiru sira iha kalan bainhira Muralla Xina prontu, sira ba ne'ebé?

Roma ne'ebé aas, nakonu ho arku triunfu nian:
Sé mak halo hamriik?

César sira manán ba sé?
Bizánsiu ne'ebé hawelok knananuk, nia palásiu la'ós ba uma-na'in de'it?

Nune'e, lendária Atlántida
Iha kalan tasi-boot hamout, tasi halerik ba nia atan sira.

Mane-klosan Alexandre konkista Índia.
Mesak?

César baku-rahun Gauleze sira
Laiha koziñeiru ida hamutuk ho nia?

Filipe husi España tanis bainhira nia armada mout
Nia mesak maka tanis?

Frederico II manán Funu Tinan Hitu
Aleinde nia, sé tan?

Pájina ida, vitória ida.
Sé maka tein hahán festa nian?

Iha dala tinan sanulu, iha ema boot ida.
Sé maka selu nia konta?

Iha istória barak loos
Iha pergunta barak loos

Rabu, 18 April 2018

MARÍ ALKATIRI NO JOSÉ RAMOS-HORTA*

Marí Alkatiri no José Ramos-Horta kuaze sempre asosia ho luta ba ukun rasik-an. Ida-ne'e la'ós atu minimiza papél indivíduo sira seluk liuliu povu Maubere tomak merese hetan respeitu no um minuto de silêncio ba mártir sira hotu ne'ebé sakrifika vida ba Timor-Leste nia independénsia. Ohin loron Marí Alkatiri no José Ramos-Horta tane liman hamutuk filafali ho bandeira fitun-mutin FRETILIN nian, nune’e presiza haktuir sira-nia ain-fatin pedasuk balun.

Fila ba dékada 1960, Timor-Portugés iha impériu koloniál Portugál hanesan paraízu ki'ikoan ida ho polísia polítika husi rejime faxista iha kintu-kantu hafuhu hela. Husi situasaun ne'e joven Alkatiri no Ramos-Horta hatudu neon-taridu ba nia rain ne'ebé dukur nakoron. Nune'e, joven edukadu sira hanesan Marí Alkatiri, José Ramos-Horta, Nicolau Lobato, Justino Mota no Francisco Borja da Costa hamutuk hahú grupu diskusaun anti-koloniál. Até grupu ki'ik ida hahú kedas husi tinan 1967, mezmu seidauk iha influénsia boot. Hafoin Marí Alkatiri ba Angola hodi estuda Topografia durante tinan rua ne'ebé nia koko kontakta ho Movimento Popular de Libertação de Angola (MPLA), maibé reseu malu tanba deskonfia karik ida seluk polísia polítika portugueza nian.

Inisiu dékada 1970, bainhira timoroan hahú hakerek tópiku restritu balun ho liberdade ba espresaun ne'ebé limitada, Marí Alkatiri no José Ramos-Horta ativamente hakerek artigu, inklui mós intelektuál timoroan sira seluk iha jornál Seara ne'ebé padre Martinho da Costa Lopes asume responsabilidade editoriál. Maibé José Ramos-Horta mós tenke exiladu ba Mosambike durante tinan rua. Tanba tuir polísia polítika Direcção-Geral de Segurança (DGS), Ramos-Horta hatete ba turista amerikana katak Portugál se labele dezenvolve Timór, di'ak liu Amérika foti tiha kolónia ida-ne'e. Nune'e mós Ramos-Horta maka dala uluk foti liafuan maubere iha ninia ensaiu Maubere Meu Irmão no ikusmai Xanana Gusmão foti liafuan ne'e hodi hakerek nia poezia Mauberíadas ne'ebé tuir Marí Alkatiri hodi hasara Luís de Camões.

Liutiha Revolusaun loron 25 fulan-abríl 1974 iha Portugál, José Ramos-Horta ativa hodi organiza greve traballadór sira atu hetan saláriu ne'ebé di'ak liu. Husi episódiu ida-ne'e harii comissão para a defesa dos trabalhadores, hafoin ninia membru sira ikusmai hola parte iha ASDT ne'ebé harii fulan rua depois golpe Lizboa. Ramos-Horta nia knaar maka hakerek raskuñu manifestu ASDT nian, ida-ne'ebé ba dala uluk anúnsia iha loron 20 fulan-maiu tinan 1974 ho prínsipiu sosializmu no demokrasia, direitu ba independénsia, rejeita kolonializmu no prevensaun ativa kontra neokolonializmu, nsst.

Tuir relatóriu eis-governadór Timor-Portugés, Lemos Pires, ASDT harii husi Francisco Xavier do Amaral (37 anos), Maria do Céu Pereira, Nicolao Lobato (26 anos), Aleixo Corte Real, Octávio Jordão de Araújo, Afonso de Araújo, Rui Fernandes, Floriano Chaves no Sebastião Montalvão, no klaru José Ramos-Horta (25 anos), Marí Alkatiri (24 anos) no Justino Mota. Ikusmai bainhira estudante sira fila mai husi Portugál iha fulan-setembru 1974, hanesan Abílio Araújo, Guilhermina Araújo, Mau Lear, Sahe, Venâncio Gomes, João Soares no Hélio Pina lori influénsia boot ba transformasaun ASDT ba FRETILIN. Liuliu estudante sira-ne'e iha kontaktu ho estudante kolónia portugeza sira iha Áfrika lori mós koñesimentu kona-ba movimentu libertasaun.

Estudante sira-ne'e konfronta ho ideia foun sira ne'ebé dezenvolve ona iha Timór, atu halai ba objetivu ida, ho influénsia husi Borja da Costa. Hamutuk maka sira muda ASDT ba FRETILIN, ne'ebé fó hanoin ba movimentu libertasaun mosambikanu, Frente de Libertação de Moçambique (FRELIMO). Primeiru manifestu FRETILIN hakerek: A Associação Social-Democrata Timorense considera-se intérprete dos mais profundos anseios dos Povos do Timor-Leste, e em razão disso PROCLAMA-SE o único representante legítimo do Povo e passa; a designar-se Frente Revolucionária de Timor-Leste Independente.

Oinsá mós Marí Alkatiri no José Ramos-Horta nomós kuadru FRETILIN sira seluk tempu ne'ebá hili dalan ida-ne'ebé lahó violénsia hodi rezolve problema Timór, nune'e harii koaligasaun ho UDT. Maibé ho presaun Indonézia, konflitu internu no influénsia Funu Malirin (Guerra Fria) iha mundu tomak, provoka UDT lansa golpe iha loron 11 fulan-agostu 1975. Ida-ne'ebé FRETILIN tenke hatán ho kontra-golpe iha loron 20 fulan-agostu.

Iha kalan golpe membru balun Comité Central da FRETILIN, tenke evakua ba sidade Dili ninin lidera husi Nicolau Lobato. Iha grupu tolu xefia husi Nicolau rasik, grupu ida Alarico Fernandes mak xefia, no grupu ida seluk Mari Alkatiri mak xefia ne'ebé envolve mós Xanana Gusmão nu'udar eskoltu, hafoin sira marka atu hasoru malu iha mota-ulun. Grupu hirak ne'e ikusmai hakat ba Asirimou (Aileu) fatin primeira baze Brigada Revolução FRETILIN. Husi ne'ebá hahú kontakta sarjentu no soldadu timoroan sira ne'ebé sai tropa portugeza iha Aileu. Inklui hakerek mós testu proklamasaun Insureisaun Populár Armada atu hala'o kontra-ofensiva ba UDT ne'ebé hahú kedas iha loron 12 fulan-agostu. Tuir ida ne'e maka harii primeira kompañia Forças da FRETILIN ne'ebé foin hetan naran FALINTIL iha loron 18 fulan-agostu. Maibé loron moris FALINTIL konsidera loron 20 fulan-agostu tanba loron ne'ebá maka soldadu no sarjentu timoroan sira barak envolve iha FALINTIL[1] nomós hala'o levantamentu iha sidade Dili ho kontra-ofensiva hasoru UDT.

Ikusmai administrasaun portugeza evakua ba Ataúro no FRETILIN kontrola Timor-Leste tomak exetu enklave Oecússi no illa Ataúro. Maski nune'e situasaun namanas nafatin tanba iha posibilidade boot Indonézia hala'o invazaun. Até iha loron 25-26 fulan-novembru 1975, ezérsitu Indonézia hadau Atabae (Bobonaro). Portantu ezijénsia timoroan sira ne'ebé funu iha fronteira, hakarak mate hodi defende país independente ida; vizita diplomátika Marí Alkatiri ba Áfrika katak país 25 sei fó apoiu, entaun iha loron 28 fulan-novembru tinan 1975, FRETILIN halo proklamasaun unilaterál República Democrática de Timor-Leste (RDTL). Loron rua depois, Comité Central da FRETILIN haruka Marí Alkatiri (Ministro de Estado para os Assuntos Políticos), José Ramos-Horta (Ministro dos Negócios Estrangeiros) no Rogério Lobato (Comandante das FALINTIL no Ministro da Defesa) ba li'ur hala'o serbisu diplomátiku. Ohin loron Marí Alkatiri no José Ramos-Horta nafatin hamutuk ho povu Maubere, kontinua serbisu ba rai ida-ne'e no sei marka tan istória foun. Venceremos!


Publika ba kampaña Eleisaun Antesipada, loron 14 fulan-abríl tinan 2018
[1] Caetano Guterres Maulori iha ninia artigu ida ho títulu “Sé mak fundadór Falintil?” hakerek iha loron 20/08/2013, konsidera Marí Alkatiri nu’udar fundadór FALINTIL ida.
Top of Form


Jumat, 16 Maret 2018

LIAFUAN LAKON

Liafuan ida lakon
bainhira estrofe ida atu hakotu 
iha asu nia tanis ho poema madrugada nian

No melódia ida naksala
bainhira ritmu ida-ne'e hananu
ha'u latan iha lalatak ó-nia hakohak, lanu

No hanesan sabór ida-ne'ebé ha'u kaan
husi turuk ikus iha botir ibun
ha'u hakarak moris ho re'in naruk husi ó-nia ibun

Basá bainhira knananuk sira hanesan aljemas ne'ebé kesi ha'u liman-ain
ha'u hakerek ha'u-nia versu ida-ida iha ulun, entre didin mate nian
atu pelumenus iha liafuan ida-ne'ebé ha'u dedika ba

No molok fatin kloot ida-ne'e oho isin-lolon 
ha'u husu tuir anin, karik huu ba ne'ebé loos?
hodi haruka tuir kansaun ida-ne'e ba iis ida-idak ne'ebé nakoron

Basá ha'u moris
ho liafuan ne'ebé nakfila ba lírika
ho ton ne'ebé nakfila ba melódia 
ho ritmu ne'ebé nakfila ba dahur
nu'udar hananuk entre ema sira ne'ebé lakon-neon, terus no luta 
iha fatin ne'ebé nakukun no fuik, bele moris ho mehi rohan ida

No hosi hananu ne'ebé ha'u hakerek, doben
iha domin rohan-laek ne'ebé ita fahe ba malu 
tan bainhira lia-anin to'o-mai katak ha'u sei la haree tan ó
sei iha ema ida maka hananu ba 
ka pelumenus anin kalan haktuir ba 
katak liafuan lakon ne'e, nakfila ba ó-nia naran
tan domin mak ó-nia naran

Dili, 15 de Março de 2018

Sabtu, 20 Januari 2018

DILI - ATAÚRO NO LALORAN TASI

Laloran tasi baku ba mai
atu tasi furin, haksasin
ema sira mout iha tasi
tan kilat-musan!
iha loron invazaun
dezembru hitu-nulu-resin lima

Laloran tasi baku ba mai
atu tasi furin, haksasin
ema la'orai, hakur tasi
hafoin knua no sidade, motuk
iha loron liberdade
setembru hitu-nulu-resin-sia

Iha lorokraik
entre Dili no Ataúro
laloran tasi la hakmatek
to’o ema be moris aprende buat ida
husi rihun be husik nia rain
husi rihun be hetan persegisaun
husi rihun be mate.

Lorokraik, Jardín Halí-Hun, Dili.
Loron 1 fulan-setembru tinan 2009.    

[1] Publika ho artigu " Poezia Ida, Depois Fulan-Agostu", iha jornál Kla’ak Semanál, Númeru 48/Loron 11 fulan-setembru tinan 2009.

NINO KONIS SANTANA

Rai-kidun
nia uma-kakuluk

Paitxau
Matebian
Ramelau
Klablaki
Leolaku
Nia dalan leut

Tuba rai metin
babelun karabina
Mate lahó lelir tristeza
rate lahó ai-funan futun

Rai, foho, lalehan, balada fuik
ai-horis, ai-laran tuan
bee-matan tasi Timór hakmatek ba

Ikan ho bee-lihun
hafalun funu
hori loresaa:
Halu marau Txitxeken naten halu fai! [3]

Dili, 15 de Agosto de 2012. 

Jumat, 19 Januari 2018

KRÚS MUTIN

Entre fronteira sidade
tempu la’o hakotu
iha nia mahon anin malirin simu
hafoin funu hotu

Foin liubá
hamriik hafunan foho-oan, krús mutin sira haklalak
dala balu triste, maibé nabilan…
tadak domin husi sira be moris ba sira be mate
trikota dame, hafoin funu hotu

Balide, 17 fulan-abríl tinan 2010.

URU... FULAN...*

Uru… fulan…
biar mundu konkista ó
ó-nia naroman hanesan feto-raan nia oin-midar
ó-nia naroman lalenok kalan, nabilan mundu rai-klaran

Uru… [1]
Metxi-uru… fulan metxi 
hafuik tempu, hafunan rituál tasi, haknata hahán tasi 
oh Metxi... oh Eunice Viridis... oh Ular-tasi... 

Uru…
Uru hara… Fulan roman
ó-nia nabilan hafurak rai, haktuir ó-nia mitolojia
Pui Tanakail ho Mai Tanakail kaisala i’i [2]

Uru-vatxu… lian ida haklalak hamulak
Uru-vatxu! Maromak! [3]

Fataluku sira matan monu ba ó
hasara, Atxare[4]


Publika iha Kla’ak Semanál, Númeru 50/14, fulan-novembru 2009. Dili, loron 4 /10/09, bainhira fulan-naroman.  
[1] Fataluku sira antes hetan influénsia luzofonia (Latín-Portugés) uza liafuan Metxi Uru ba tempu entre fulan-marsu no fulan-abríl, bainhira halo rituál Metxi Me’e iha fatin tolu: Tutuala, Lorehe no Com (Konu, signifika nakukun). Metxi ka ular-tasi ho naran sientífiku Eunice Viridis, budu halo balxaun.
[2] Tuir ema fataluku nia mitolojia iha ema na'in rua: feto Pui Tanakail (Pui Liman-kle’uk) no mane Mai Tanakail (Mai Liman-Kle’uk) lulun hela kabas bainhira kalan fulan-naroman.
[3] Uru lia-fataluku ba fulan, tutan ho Vatxu ka loromatan nia signifikadu sai Maromak (Uru-Vatxu) iha Fataluku sira-nia sistema fiar tradisionál, antes uma-kreda Katólika adota/hafudi, no dalabalu sai tiha Pal Uru-Vatxu ka Aman-Maromak.
[4] Tuir ema fataluku balu, fulan sai signu ba buan (Atxare iha lian Fataluku). Neil Ammstrong dehan sama nia ain ba fulan, iha tinan 1969.