Jumat, 03 Februari 2017

SIDADE DILI


 

Múzika barullu husi bár iha otél tasi leten, halo pesoál internasionál ida kaan hodi tolan gin tónico husi kalis, hafoin soe oin ba sabutar entre illa Ataúro no Alor. Sabór kada turuk, la kura saudade ba ninia doben iha rai dook to'o loron ida sofrimentu rai-manás tropikál ne'ebé sunu nia kulit hakotu. Ho hamnasa nia dere arame, atu fila ho konta bankária nato'on ba loron kazamentu nian. Momentu ne'e malae rai oioin, mai butuk nabanaban halo Dili sai sidade internasionál ida. Rihun boina azúl ONU (Organização Nações Unidas) nian ho retratu metan-mutin ahi-kadesan uma motuk forma paizajen paradoksál iha tinan 2000. Otél Olympia reprezenta mundu luxuozu hasoru Palácio das Cinzas nu'udar símbolu destrutivu ida-ne'ebé bárbaru iha Timor-Leste inísiu sékulu da-21 ho instituisaun mundiál sira ne'ebé hatuur rai ida-ne'e ba pontu zeru.

Husi mahon ai-hali okos dalan ninin sira pelumenus kontráriu ho retratu metan-mutin, ema ida-ida hadau moris. Ibun sira temi Hello Mister to'o liafuan rua ne'e sai naran supermerkadu ne'ebé motuk iha krize 2002. Ba timoroan moris la'ós husi pontu zeru. Esperiénsia naruk kolonizasaun portugés ne'ebé ladún halo buat ida iha rai ida-ne'e, dala balu mosu iha memória nu'udar kalan malisan. Hafoin opresaun moruk okupasaun indonéziu ne'ebé só bele kompete ho okupasaun japonés, halo timoroan memoriza períodu portugés nu'udar tempu ‘rai-sei-di'ak.’ Rezisténsia hasoru okupasaun li'ur, liu nato'on nu'udar esperiénsia folin aas hodi harii moris fila fali.

Nune'e diáspora sira mós to'o mai, nakfila lais nu'udar elite foun. Entre sira-nia klike, ida-rua foti an, hatuur timoroan rai-laran durante okupasaun ba pontu zeru. No liu tinan balu mosu piada sarjana supermi. Mézmuke susar atu buka-tuir ninia hun, halo “intelektuál” balun laran-kanek, maibé la konsege prodús 'piada' boot ida ho sentidu sarkástiku ka pelumenus umorístiku hodi hatán. Só ruun nehan durante hemu kafé iha konversa lorokraik iha sidade ida-ne'ebé lia-anin bele sai headline jornál nian no ema sei fiar lia-anin hanesan intelektuál balun reativu ba hoax iha mídia-sosiál. Maibé ohin loron, diaspora ida, eis-Ministra Finansa sai procurado.

Sira ne'ebé sai husi runguranga nia korasaun nafatin hadau moris iha Dili. Sai interpreter, security, pesoál ONU ka ONG (Organização Não Governamentais) lokál ou internasionál ho saláriu ki'ik, maibé barak liu maka buka moris iha dalan ninin iha sidade ne'ebé sai lixeiru ba karreta segunda-maun Singapura nian. Maibé halo laran-moras maka labarik sira leba sabraka iha lurón no balun ho inosente faan CD (Compact disc) 18+ ho dezeñu feto-mane isin-molik halo pozisaun sexuál oioin iha edifísiu tuan SCT (Sporting Clube de Timor). Livre! CD sira-ne'e tropa Interfet (The International Force for East Timor) soe ba lixeiru, hafoin raut fali ba merkadu. Ne'e hotu pelumenus mantein ahi-matan suar, bainhira kapitál boot ho májiku nakfila uma motuk balun sai restorante ho kliente multinasionál.

Sidade ida-ne'e mós hatudu ninia dignidade ho graffiti: A luta continua! No laran-di'ak nafatin hodi simu ema-nia sirkulasaun husi fatin oioin. Hori tranzasaun ai-kameli, to'o tempu koloniál ho governadór portugés ida halai husi funu iha Oecusse maka tau fundamentu ba sidade ida-ne'e tinan 1769. Governadór ida hetan oho husi revoltozu timoroan iha área Lahane no ida fali ho ferik-oan subar iha ró-boot iha tasi-klaran durante funu hasoru Dom Boaventura to'o kanoñeira Pátria husi Mosambike hatún ankora hodi hakalma situasaun. Iha Funu Mundiál da-2, sidade nakfila ba zeru, basá bombardeia husi australianu sira durante okupasaun japonés.

Dekáda haat tuirfali reasionáriu sira sees husi sidade ba Timór Indonéziu. No governadór koloniál ikus halai momentu kalan ba illa Ataúro no ikusmai sees an ba Austrália. Dili namanas ho saudações revolucionárias, Viva Fretilin! Hafoin loron domingu ida iha tinan 1975, hori dadeersaan aviaun sira hatún parakedista. “Tropa indonézia sira tun husi lalehan hanesan anju, mas to'o iha rai nakfila sai diabu,” dehan administradór apostóliku, Dom Martinho Lopes. Loron ne'e poeta ida mate barbaramente iha Ponte-Kais, husik versu ne'ebé halo isin no klamar nakdedar: Na ponta da minha baioneta escrevei a história da minha libertação.

La'ós buat fasil moris hamutuk inimigu ho governadór fantoche ida. Iha kultura klandestina ema hato'o informasaun ba malu ho jestu, ho subar, ho bisu-bisu no deskonfia to'o hafuhu malu. Kada bairru iha postu militár no kada espasu militarizadu ho bufo ka mauhu. Loja Sang Tai Ho iha Colmera no Komarka Balide sai prizaun ilegál inklui mós edifísiu balun ho bapa sira maka nakonu iha sentru sidade nian. Pasar Senggol iha Bidau Mota-Klaran domina ho negosiante indonéziu, dala balun sunu-rahun tan rai-na'in sira marjinalizadu liután. Maibé sidade ne'e hakfodak uluk ho asaltu tinan 1980 husi diresaun tolu: Marabia, Paiól Lahane no Becora. Forsa okupante hatán ho kruél, lori prizoñeiru sira ba illa dadur nian, Ataúro. Iha-ne'ebá matan sira hateke ho tristeza ida-ne'ebé dodok ba sidade. Enkuantu iha Dili, ema barak hasubar an loron ba loron, moras, traumátiku, ki'ak ho kontrolu totál.

Dili mós tanis ba ninia joventude sira ne'ebé mohu tan rajada kilat-musan molok oras han meiudia iha Santa Cruz, tinan 1991. Kalan nakukun ema ida bele lakon derepente. Ka pelumenus lakon ninia tilun. Ida-ne'e inspira eskritór indonéziu hakerek kontu Telinga, imajina soldadu nia mehi-aat tan ko'a tilun durante interrogatóriu. Tinan 1999, sidade iha pontu zeru, rahun molok miléniu foun. Tanba ahi-han husi rohan ba rohan, husik hela sidade mate-klamar ida, molok foho sira haklalak ba aviaun Interfet nian. Ema sira tun nadodon, kumprimenta no hakohak malu, komemora moris. Dala balu nein turuk matan-been. Ohin loron sidade ida-ne'e sei sunu lilin no buka tuir ema lakon nia paradeiru.

Maibé sidade mós bele rahun la'ós tan kauza husi li'ur. Tinan 2006, ninia abitante odi malu no fahe malu tuir étniku lorosa'e-loromonu iha tinan balu, tan de'it ambisaun ba podér ho Majór ida iha sentru konflitu nian to'o Prezidente RDTL ida hetan tiru iha tinan 2008. País viziñu mós provoka situasaun, hakribi sidade ne'e hanesan hahalok violentu nu'udar fatór inerente eskluzivu husi sosiedade ida-ne'e. Entaun mídia prinsipál husi Kamberra no Jakarta halo tuir jogada foer hori tinan 1975 nian, hatún notísia propagandístika. Ne'e hotu indiretamente kontribui ba memória kona-ba torturasaun, violasaun, insultu ho fitar iha kantu sidade nian.

Aleinde istória kona-ba masakre no trajédia orrivél sira, tuirloloos Dili mós fó lembransa furak. Iha okupasaun indonézia, kantór Tony Pereira dedika kansaun Rai Dili, Rai Sidade, deskreve sidade nia furak ho ai-kasi sira to'o Bazár Malinamuk iha sidade ninin. Kantora indonézia ida hananu Januari di Kota Dili, kona-ba domin nafunan iha sidade. No refujiadu timoroan iha Kupaun (Timór osidentál) hananu Gadis Lorosa'e ba doben hotu-hotu ne'ebé sira husik iha sidade.

Hodi ninia murak sira, Dili sai sidade kosmopolita. Singapurense ida, liutiha viajen ba Dare no Hera, deskreve vista husi foho-leten ba sidade, tasi, illa Ataúro no Wetar ho admirável. Brazileira ida louva kualidade sidade ki'ik ho distánsia fatin ida ba fatin seluk besik malu. Relevu ho sidade, foho, baía, ró sira, tasi-ibun no tasi azúl hakalma fuan halo fotografista ansi tan loron atu mout ba dala ikus nian. No turista australiana ksolok ho múzika viva iha lia-tetun ka lia-portugés, ritmu samba ka kizomba áfrika nian to'o kansaun melankólika husi brazileiru Roberto Carlos no festa-karnavál ho festa-muzikál. Gastronomia auténtika oioin husi Portugál, Indonézia, Xina, Brazíl, Austrália, Japaun, Índia, Bangladéx, Pakistaun, Filipina, Kuba, hamaluk ai-han rai-na'in iha restorante elite nian to'o fatin tunu-ikan tasi-ibun nian. No hanesan Torre de Babel naksobu, ema ko'alia lian oioin. Lian lokál sira, tetun, portugés, inglés, indonézia, mandarin, hakka, kastellañu, javanes, tagalog, bengali, nst.

Iha Área Branca ho churrasco (barbeque) ka hemu nu'u-been hodi hein loro nakaras ho kompaixaun. Balun halo ezersísiu: halai, hean bisikleta, to'o tun-sa'e eskada iha Kristu-Rei ho vista ba sidade no ida-idak koko atu persebe saida maka furak. Iha tutun liu maka estátua boot foer ho knuuk manu-andoriña nian, ditadór ida maka harii hodi hadau povu nia fuan ba polítika integrasaun nian. Ohin sai marka turístika no fatin via sacra ka misa Katólika nian. Boatu balun, haktuir ninia sagradu kontamina ho malae balun tempu Untaet (The United Nations Transitional Administration in East Timor) momentu kalan boot halo relasaun íntima iha-ne'ebá, inklui joven balun namora la kontrola sira-nia dezeju primitivu. Iha oeste estátua João Paulo II no kapela ho paijazen lago kiik tolu, eskada vertikál, manu-fuik semo, foho kór-kafé fó pintura rai-maran ne'ebé únika. Maibé área Tasi-Tolu mós kontamina ho hahalok bandidu sira obriga ema halo relasaun sexuál hafoin hasai ninia vidéo nu'udar eskandalozu ba sidade.

Sidade mós hatudu vida fuik seluk. Restorante husi El Legendario to'o Nelio Restaurante iha diresaun Metiaut nian fó kotuk ba tasi nu'udar lixeiru jigante no halakon vista ba orizonte; loroloron ai-hun ida latan nein troka ho ai-oan foun; uma sira ho moru aas lahó sentidu estétiku no dala balu anti-viziñu; kuadru publisitáriu hamriik loko-an ho lian oioin liuliu lia-tetun ho ortografia kaótika; espasu aglomeradu lahó drenajén di'ak ho bee-kanu fakar arbiru no lixu uma-ka'in bou iha dalan ninin to’o loron ida inundasaun tempu udan halo bainaka sira tenke leba sapatu maka tun husi aviaun iha aeroportu Nicolao Lobato.

Sidade mós prepara an hodi simu governu ba períodu tinan 2017-2021 no soi mall ida tan iha Comoro - Timor Plaza oin, bainhira seguransa munisipál ho ilegál hakdasak vendedór ambulante katak la serve ba sidade. Abitante seluk mós dala balun ho ilegál taka estrada publiku nian, nato'on ho bandeira mutin ki'ik iha ninin tuir ida-idak hakarak, tan festa graduasaun ka kore-metan. Mas liurai estrada loroloron mak ambulánsia, carro funerário no konvoi karreta luxu ema boot ho alarme hasees mikrolete to'o ho ilegál borus sinais luminosos lakan mean.

Kalan, tuir 'boatu' arte-marsiál sira prepara an sai guerreiro, hafuhu malu ho rama-ambon mezmu estadu proibe sira-nia ezisténsia. Meia-noite fatin balu namanas liután, mezmu lahó lokalizasaun legál maizumenus hanesan Cabaré tempu portugés ne'ebé subsubar; ka hanesan Asgor (Aspal Goreng) tempu indonézia nian. Dala balun ho distánsia metru balun de'it husi uma-lulik, porstituta xineza, vietnamita, indonézia, ka feto lokál oferese isin-lolon ba mane-nakar. Otél balu ho kuartu ba amante sira, karaoke, bár, masajén ho ahi-lakan malahuk to'o katuas ida “mate iha abrigu leten.”

Dili, sidade multikulturál prontu hodi simu dinámika oioin sira-ne'e. Loron ida liuhosi estrada Praia de Coqueiros marxa ida hatudu bandeira arkuíris. No sikun seluk iha Largo de Lecidere pár balun tuur konversa, hakohak malu, nein liga ema seluk. Mundu ne'e sira-nian, sidade romántika ne'e sira-nian. No tempu ba poezia A Natureza e a Cidade, husi Ruy Cinatti (1915-1986):

Chove, chove, sem parar              Udan, udan, la para*
na berma da minha aldeia           iha ha'u-nia aldeia ninin                       
O vale adensa a neblinha             Foho-leet metin ho abuabu
afundada na ribeira                      mout iha mota

Um veio d'água perdeu-se            Veiu bee ida nian lakon
afundado na ribeira                       mout iha mota

A luz do sol encantou                     Roman loron hafekit
a terra verde, orvalhada              rai-matak, ho maho-been
Uma brisa perpassou                    Anin-malirin ida hakur
suavemente na várzea                  lotuk iha natar 

O arroz rumorejou                         Hare bisubisu
suavemente na várzea                   lotuk iha natar 

Quem na montanha se abriga     Sé mak iha foho-tutan hamahon an
tem tempo para pensar                 iha tempu atu hanoin
enquanto a chuva desliza              enkuantu udan namdoras
que a trovoada é o mar                 ne'ebé mameran maka tasi

Os da praia já não dizem              Sira iha tasi-ibun la hatete ona
que a trovoada é o mar                 ne'ebé mameran maka tasi

Muitas cidades e ruas.                   Sidade no lurón sira barak.
Luzes me enganam, talvez.           Karik, naroman lakan habosok ha’u.
Díli, à noite, encandeia.                 Dili, iha kalan, halo laran-monu
De manhã, ninguêm a vê.             Dadeersaan, laiha ema ida haree.

É tal qual a minha aldeia.             Ida-ne’e hanesan duni ha’u-nia aldeia.
De manhã, ninguêm a vê.             Dadeersaan, laiha ema ida haree.

[*Tradusaun livre ba lia-tetun husi Sávio Ma'averu]

Sabtu, 24 Desember 2016

AI-HALI *


Fini
Halekar
Moris ai-horis
Mahon ai-hun
Mosu rai-nakaras no rai-hun-mutin
Na'i Maromak haree di'ak
Ida-ne'e loron datoluk **

Hamolik ai-tahan
Tetak ai-sanak
Tesi ai-lolon
Tan ne'e rai-manas no rai-maran
Sira haree di'ak
Ida-ne'e loron ba loron

Riba, rahun
Rohan ba rohan
Nakfera
Naksobu
Malirin mohu

Loron ida
Sokar lia
Iha moru, besi-riin no besi-betaun laran
Lian sira murmura

Romantiza
Domin ne'ebé hakoi iha lurón ninin
Saudade
Ba hali-hun ne'ebé monu latan
Mate!

Dili, 19 fulan-outubru 2016. 23:36 OTL.


* Relembra ai-hun sira ne'ebé tesi arbiru iha sidade.
** Inspira husi Génesis.

Senin, 19 Desember 2016

TIMOR-LESTE: KOLONIZASAUN NO KRUZAMENTU KULTURÁL*



Sufocaste minha cultura
Na cultura da tua cultura
       - Borja da Costa - 1975 

Loron 28 fulan-novembru tinan 1975, Fretilin deklara unilateralmente República Democrática de Timor-Leste (RDTL) independente no anti-koloniál. Husi períodu ne'e intelektuál timoroan sira mós hamosu propozisaun “Portugál koloniza Timor-Leste liu tinan 400.” Ideia ne'e kontinua metin no reflete husi komemorasaun xegada portugés iha Oe-cusse tinan 2015. Maibé presizaun husi sékulu haat kolonizasaun no ideia kruzamentu kulturál ne'ebé foti influénsia portugés nu'udar identidade prinsipál merese atu kestiona hodi hanoin Timor-Leste nia istória naruk ho nia diversidade kulturál.

Kolonizasaun durante sékulu haat?

Identifika xegada portugés tinan 1515 nu'udar inísiu kolonizasaun hamosu impresaun simplifikativu ne'ebé la reflete komplesidade istórika. Malai-mutin mezmu hori sékulu da-16 tau ain iha Oe-cusse la signifika koloniza kedas rai-Timór. To'o tinan 1550 baze prinsipál portugés iha Solor hafoin hola ai-kameli, bani-been no lilin ho intermediáriu padre dominikanu sira. Bainhira olandés sira to'o-mai tinan 1613, reinu ki'ik maizumenus 60 ho soberánia rasik harii konfederasaun Serviaun iha Oeste no Belos iha leste. Laiha unifikasaun ida no la nakfera keta-ketak maibé kria relasaun ierárkika klan nian liuhosi sistema troka sasán ho tributu ba liurai.

Ida-ne'e esplika oinsá reinu sira iha kapasidade halo aliansa ho olandés, portugés no topasse (portugés metan) to'o konsege soran ema rai-li'ur sira-ne'e durante sékulu da-18. Rivalidade ne'e remata depois Funu Penfui (1749) ho konsekuénsia rai-Timór fahe ba rua: olandés iha loromonu no portugés iha lorosa'e. Husi ne'ebá mosu relasaun respeita malu, laiha podér ida habelar sira-nia influénsia no relativamente sosiedade timór moris hakmatek lahó atake ka perturbasaun (Taylor: 1998). Ikusmai liña fronteira Timor-Portugés – Timor-Olandés deside liuhosi Tribunál Internasionál iha Aia (Den Haag, Olanda) tinan 1913, katak Portugál ukun parte leste illa Timór ho enklave Oe-cusse.

Primeiru governu portugés hatuur iha Lifau tinan 1703 ne'ebé trata rai-Timór nu'udar protetoradu. Hafoin atake Topasse konsege oho governadór portugés ida iha tinan 1766, no serku ida ba enklave ne'e halo governadór foun Dionísio Galvão loron 10 fulan-outubru 1769 muda baze mai Dili nu'udar kapitál foun. Períodu ne'e portugés sira la mete polítika interna reinu timór sira ne'ebé sei hamriik ukun rasik-an durante sékulu da-18. Katak kolonizasaun seidauk hahú.

Hafoin períodu governadór Celestino da Silva (1894-1908) tinan 1860 hahú harii postu militár iha rai-laran no hala'o kampaña militár hasoru reinu sira ne'ebé la hakruuk hodi nune'e kontrola territóriu Timor-Leste tomak. Husi ne'e reinu Timór sira lakon autonomia, lakon kontrola ba rai, lakon direitu atu iha tropa armada no hahú oferese ema ba serbisu públiku, introdús kultura kafé nian to'o penetrasaun kulturál ba moris loroloron mezmu iha superfísie liuhosi prezensa assimilado sira. Períodu ne'e portugés sira foin hametin sistema koloniál. Katak kolonizasaun Timor-Leste atus-haat-lima-nulu desde 1515 la loos nu'udar propozisaun.

  Kruzamentu kulturál

Se tinan 1515 la inísia períodu koloniál, la signifika tempu xegada malae-mutin merese atu hetan komemorasaun tinan 500 nian. Prinsipalmente nu'udar asaun ida atu glorifika prezensa portugés, maibé lahó argumentasaun istórika ida-ne'ebé forte. Basá rasíona ba karatér opresivu hosi esplorasaun koloniál iha Timor-Leste ka kolonializmu globál katak susar atu imajina indíjena ida iha gueto atu festeja loron xegada Cristóvão de Colombo iha kontinente amérika tinan 1492.

Entaun governu RDTL selebra tinan 500 foka ba enkontru no kruzamentu kulturál iha Timor-Leste desde sékulu da-15. Selebra mós kriasaun Zonas Especiais de Economia Social de Mercado de Timor-Leste (ZEEMS TL) iha enklave ne'ebé durante kolonizasaun sai pontu atrazadu ba espetativa murak-mean sékulu da-21 nian. Iha rejiaun ne'ebé komesa revitaliza identidade melanézia desde Flores to'o illa Maluku sira no Papúa to'o país pasífiku sira. Portantu Liran, Wetar, Kisar, Romon to'o Leti (Maluku Sudueste) neineik hatudu insatisfasaun ba Jakarta. Kestiona identidade 'indonézia' ne'ebé Java-sentrizmu, enkuantu ezisténsia RDTL ho abut melanézia hetan progresu iha kedas sira-nia hirus-matan.

Kultura austronézia-melanézia pasa fronteira nasaun Ázia Sudeste sira hori tempu migrasaun tinan rihun liubá ne'ebé fó abut kulturál ba Timor-Leste. Mézmuke similaridade kulturál la signifika unidade polítiku, tan país eis-koloniál ida-idak ho baze istórika rasik. Tema nasionalizmu Fretilin tinan 1975 afirma katak kolonizasaun portugál kria destinsaun kulturál entre Timor-Leste ho timór osidentál; reafirma iha apelu Kayrala Xanana hasoru tribunál Indonézia tinan 1992; espresa iha lírika kansaun Abílio Araújo ne'ebé hakribi kolonizasaun sékulu haat maibé implisitamente refere 1515 nu'udar tadak diferensiál. Aleinde ne'e distinsaun kulturál ida ba Timor-Leste maka identidade maubere ho karatér populár ne'ebé (dala balu) reflete luta da classe. Se dékada 70 seidauk iha retórika kona-ba austronézia-melanézia, entaun omenajen ida liga termu antropolójiku ba poeta timoroan liuhosi naran Fundação Austronésia Borja da Costa harii iha Lizboa tinan 1985 ho publikasaun Tebe: colectânea de canções populares de Timor-Leste iha tinan 1987 no Cantolenda Maubere iha tinan 1993.

Biar nune'e kruzamentu kulturál austronézia-melanézia la sai kedas diskursu iha timoroan nia leet, aleinde mosu iha testu istóriku ka antropolójiku ligadu ba difusaun linguístika. Reafirmasaun identidade melanézia iha rejiaun ne'e depois Timor-Leste dékada rua kore an husi okupasaun Indonézia ho mundu ida integradu liu tan revolusaun internet halo komemorasaun tinan 500 karik merese nu'udar reindivikasaun istórika ba baze identitária timoroan sékulu da-21 nian. Ida-ne'e tenke lahó intensaun foti influénsia luzofonia nu'udar kultura dominante. Katak presiza hasees ideia luzo-tropikalizmu Gilberto Freyre períodu Salazar, katak portugés sira mak iha misaun únika hodi siviliza rai-na'in (timoroan) sira.

Kruzamentu kulturál sei metin, se deskobre abut loloos husi ita-nia identidade. Harii husi sínteze kulturál hori períodu migrasaun nian, interasaun ho rejiaun molok xegada portugés, kolonizasaun portugés no okupasaun militár rua: japonés iha Funu Mundiál Daruak no indonéziu iha metáde dékada 1970 nian to'o rohan 90. Deskobrimentu no inovasaun identitária tenkesér reflete realidade kulturál oioin husi moris loroloron nian. La'ós asaun serimoniál maibé manifesta iha moda produsaun nian, hakbiit iha arte, siénsia, múzika, festivál, leitura no literatura, filme, desportu, gastronomia, nst.

Nune'e mós influénsia luzofonia hori tinan 500 ho reintrodusaun língua Camões tenke fasilita timoroan hotu. Laiha eskluzividade elite nian atu hetan espasu kulturál iha CPLP (Comunidade dos Países de Língua Portuguesa), mas tenke akomoda kultura populár iha Timor-Leste. Momentu país ida-ne'e aproxima an ba Asean (Association of Southeast Asian Nations) no ideia 'melanézia' kontinua artikula nu'udar identidade iha parte leste Indonézia. 

* Publika iha Timor-Post, loron 22 fulan-dezembru tinan 2016.

Senin, 03 Oktober 2016

KASADÓR



Iha tempu loro-matan triste
Kasadór sira tun husi foho-tutan
Iha lian hakilar tun-sa’e

Ami serbisu hodi kosar-been
Maibé na’ok-teen sira riku ba beibeik

Ami harii hodi haburas dame
Maibé imi fakar osan hodi soran ami

Ami la’o ain-tanan
Maibé imi semo hale’u rai

Ami tuur iha rai-nakukun
No ahi-lakan iha imi-nia kintál

Ami sai lutu ba imi
No imi festa to’o lanu

Imi duni sai ami
No ema aat imi fó fatin
Imi temi ami beik no imi matenek-na’in
Imi temi ami ki’ak ba hametin ukun imi-nian
Tan ne’e
Ita la hemu-raan!
Ita la’ós aliadu!

Ami sei hamulak ho lian bei’ala nian
Iha tempu udan-been habokon no rai-lakan tarutu
Ami sei sai kasadór!
Ami sei tiru ho rama-oan!
No na’ok-teen sira sei halerik hodi isin-fulun hamriik

Dili, loron 3 fulan-outubru 2009

Minggu, 11 September 2016

REVOLTA DOM BOAVENTURA IHA MANUFAHI (1911-1912)*




Lia-maklokek

Timor-Leste desde uluk tama ba rede komersiál famozu nu'udar illa ai-kameli (Santalum Album) ne'ebé atrai prezensa portugés sira hahú sékulu da-16. Bainhira portugés sira buka koko hametin nia ukun koloniál mosu funu beibeik iha illa Timór, basá reinu sira harii aliadu ho koloniál olandés ka portugés hamosu rivalidade n, inklui mós ho Topasse ka jerasaun portugés metan nu'udar forsa ekilibradu ida.  Portantu funu no revolta sira hosi sékulu da-18 ba kotuk, nia motivu hodi kontrolu komérsiu ai-kameli, maibé ikusmai hasoru prátika finta ho forma sasán komersiál ne'ebé reinu sira tenke selu ba koloniál portugés. Hosi sorin ida funu mosu dalabarak entre reinu iha illa Timór ne'ebé hadau malu rai, rikusoin ka kauza seluk.

Iha meadu sékulu da-19, revolta hasoru portugés dalabarak mosu tanba reinu sira la simu rasionalizasaun ne'ebé implementa hosi governadór Afonso de Castro liuhosi kultura kafé depois ai-kameli hahú mohu. Polítika rasionalizasaun dalabarak hamosu intervensaun direta governu portugés hasoru podér reinu nian. Nune'e, mosu revolta iha Laklo no Ulmera (Tinan 1861); Vemasse, Lermean no Saniry (Tinan 1867); Kova (Tinan 1868); Revolta Moradóres (Tinan 1887); Revolta Maubara (Tinan 1893); no ikusmai Guerra de Manufahi (Tinan 1894) ne'ebé to'o tutun bainhira revolta lidera husi Dom Boaventura husi tinan 1911-1912.

Funu hahú hosi Dom Duarte Souto Maior.

Funu Manufahi hahú kedas hosi Dom Duarte da Costa Souto Maior. Nu’udar liurai Manufahi mézmuke rekoñese soberania liurai Portugál (1874) no hatán atu selu finta maibé nia nunka selu dezde tinan 1860. Husi tinan 1895 Dom Duarte lakohi tán atu selu finta no forñese ema na'in 20 ba governu portugés hodi serbisu. Nia hatán de'it atu halo komérsiu no simu misionáriu sira maibé lakohi tan simu portugés sira-nia ukun. Konsekuénsia husi ninia rekuza hamosu funu Manufahi, maibé Dom Duarte hetan apoiu husi xefe Raimean, Suai, Kamenasa, Tutuloru no liurai Letefoho. Iha funu ne'e forsa Portugál nakfahe ba ofisiál na'in 22, moradór 350, no populasaun mane timoroan na'in 12.000 ne’ebé ikusmai aumenta tan ema na'in 3000. Liutiha funu durante loron limanulu, parte rua sai kolen tiha no laiha ida maka manán funu. Tuirmai Dom Duarte hatán atu selu finta no simu portugés sira tau postu militar ida iha nia rai-laran, maibé rezeita atu bá Dili hodi halo juramentu no hakruuk ba governadór.[1]
 
Tinan 1900 funu kontinua fali. Dom Duarte kontinua nia rezisténsia pasiva, lakohi selu finta ne'ebé atrazadu no mós la permite portugés sira sai metin no forte iha ninia territóriu. Governadór Celestino da Silva tau forsa lubun ida ba dahuluk: ofisiál no sub-ofisiál na'in 100, moradór na'in 1500, funu-na'in timoroan na'in 12.300 no portadór na'in 650. Portugés sira sai vensedór tan de'it sira iha kañaun ho granada. Maibé depois funu dura semana rua nia laran, tropa portugés sira komesa fraku tanba moras varíola no dizenteria. Nune'e funu-na'in Manufahi konsege hadau kañaun portugés ida. Celestino da Silva rasik hakfodak ho timoroan nia kapasidade atu reziste no foti konkluzaun katak sei la manán funu. Nune'e nia fila hikas ba Dili, la konsege domina reinu Manufahi. Entretantu atu tane nafatin ekonomia ba kolónia Timor-portugés, iha governadór Celestino da Silva nia okos hahú tinan 1906, deside hodi truka finta ho obrigasaun per capita[2] ka kada mane ida ho tinan 17 tenke selu nia an. Ida-ne'e halo funu nafatin kontinua, depois reinu Manufahi lidera husi Dom Boaventura da Costa Souto Maior nu’udar Dom Duarte da Costa de Souto Maior nia oan.

Funu Boot Manufahi

Bainhira Dom Boaventura lidera funu Manufahi iha kauza balun maka hamosu kontinuidade funu ne'e ho ninia komplesidade rasik. Ida maka desizaun governadór foun Filomeno de Câmara de Melo hasae folin impostu per capita. Tan afeta kedas povu nia moris sai todan liu, liuliu ezijénsia governu Portugál atu aumenta númeru ema ba serbisu públiku nian no ba plantasaun kafé nian. Reinu Manufahi rasik iha tinan 1903 sai parte distritu militár Alas, antes rasionaliza iha tinan 1903. Nia populasaun 42.000 no uma 6.500 ho finta obrigatóriu kuaze $ 96.000.[3] Entretantu povu sai hirus liután bainhira hamosu proibisaun atu tesi ai-kameli, impostu 2 patacas ba tesi kada ai-hun ida, rejistu balada hakiak nian no nuu-hun, no mós impostu foun 5 patacas bainhira oho balada ba seremónia ida.[4]
 
Husi parte ida, mudansa polítika iha Portugál hafoin implementasaun Repúblika tinan 1910, hodi truka sistema monérkika hamosu konfuzaun iha liurai timoroan nia leet, liuliu tanba hakotu lasu simbóliku ne'ebé kesi liurai timoroan ho monarkia Portugál. Liurai timoroan rasik konsidera bandeira monarkia azúl-mutin nu'udar 'lulik' ida, basá susar hodi esplika objetivu repúblika ba sira. Entretantu iha sidade Dili, grupu timoroan assimilados mós fó apoiu ba revolta. Porezemplu hosi goeza-timorense, Domingos de Sena Barreto ne'ebé serbisu iha alfándega. Istoriadór Franses, René Pélissier hatete, liuliu tanba lema repúblika parese subversivu ba interese kaer podér. Mas laiha dokumentasaun forte atu esplika sira-nia motivasaun loloos. Entretantu Dom Boaventura mezmu hetan edukasaun europeu husi eskola misaun Katólika, Lahane, tinan 1895, maka bolu hikas husi povu Manufahi atu hatutan ninia aman Dom Duarte nia luta, maibé dala ida tan laiha dokumentasaun forte ne’ebé fó roman kona-ba Dom Boaventura ninia ideia, kona-ba liberdade ka ukun rasik an, inklui mós nia apoiante assimilado sira.[5]  

Portantu funu la'ós de'it iha Same. Atake timoroan ba portugés sira mós akontese iha Hatolia, Maubisse no Ermera ne'ebé obriga portugés sira husik sira-nia postu. Governadór Filomeno da Câmara tanba tauk, fahe kilat ba ema sivíl iha Dili no kontaktu kedas ajuda husi Makau, Goa no Mosambike. Tinan 1911, iha kapitál Dili laiha soldadu primeira liña ne'ebé nato'on hodi fó protesaun. Iha de'it soldadu mosambikanu na'in 75, europeu balun (sarjentu, kabu, soldadu no soldadu artillaria nian) ho total ema nain 40. Ne'e duni governadór mobiliza tan moradóres husi Laklo to'o hetan númeru 1500. Sira-nia kilat, tuir nia diviza, soldadu primeiru ho kilat Remington no ba moradór mak katana ho diman, aleinde  eskuadraun kavalaria - Batugade.[7]

Dom Boaventura hafoin akontesimentu, haforsa an iha Tranqueira Same. Maibé iha kontaktu planeadu ho liurai Raimean, Bubursusu, Bobonaro no Deribate. Sira-nia arma ho kilat balun, maibé prinsipál liu maka armas brancas hanesan diman, surik, katana, rama, paraões, facas, ai-dona no seluk tan. Sira harii defeza prinsipál iha fatin fuik Kablaki no ai-laran ne'ebé haleu Same. Maibé fatin importante ba funu maka Riak no Leolaku. Iha sorin seluk, akontesimentu Manufahi halo Dili laran-lametin. Governadór  Filomeno da Câmara halo reuniaun ho konsellu ofisiál sira iha Dili, hodi diskute ba ajuda vila Aileu ka defende Dili. Ikusmai da Câmara hili ajuda Aileu, nune'e iha loron 12 fulan-janeiru 1912 halo movimentu ida ba Aileu ho forsa na'in 200.[8] 
 
Bainhira  Filomeno da Câmara koko hodi hadau hikas Aileu, forsa timoroan ne'ebé nakfahe ba reinu Atsabe, Atabae, Kailaku, Deribate, Ermera, Matata, Ponilala, Suai, Leimean, Bubursusu, Alas, Turiskai, Lekidoe, Raimean no Kova la fó dalan no mós konsege hadau portugés nia kañaun ida. Nune'e governadór tenke fila mai Dili, konfunde tebes hasubar an iha ró-ahi ida maka para iha tasi. Iha loron 6 fulan-fevereiru 1912, situasaun komesa muda bainhira ró-ahi Pátria to'o-mai ho forsa husi Goa no Mosambike. Tropa foun ne'e governadór Filomeno da Câmara haruka ba diresaun súl iha loron 22 fulan-fevereiru. Nune'e forsa governu portugés okupa Aileu no Maubisse hodi prevene revoltozu sira avansa ba prasa Dili. Liutiha funu hasoru malu dalabarak maka portugés sira foin bele manán xefe sira, hanesan iha Fatuberliu, Turiskai no Bubursusu. Iha Bubursusu, portugés sira presiza mobiliza kontijente Alas, Betano no Manufahi hodi hasoru rebelde sira. Kombate Bibisuso, rezulta na'in 15 mate hosi revoltozu no na'in 2 hosi parte governu.[9]
 
Entretantu atu domina Bubursusu, governu mobiliza kombatente na'in 2950 hosi Vemasse, Laklubar, Somoro, Laleia, Kairui, Ossu, Ossoroa no Ossu. Iha loron 31 fulan-janeiru hahú liberta zona ne'ebé haleu misaun Soibada. Entretantu iha zona Ermera, komandante governu portugés Tenente António de Almeida Valente konsege domina revolta iha zona Hatolia no oho rebeldes na'in 66. Ikusmai Almeida Valente halo marxa ho nia forsa tomak ba Aileu. Maibé haforsa uluk tiha Ermera, Hatolia no Atsabe ho guarnizaun hamutuk moradór sira liu 340. Nune'e iha fulan-fevereiru 1912, forsa governu portugés nian sorumutu iha Aileu. Iha faze dahuluk ne'e, númeru timoroan ne'ebé revolta maka mate iha 360 no 320 mak kanek. Hosi parte governu portugés maka mate 24 no 33 maka kanek.[10]
 
Tuirfali funu Manufahi besik fulan lima husi fulan-fevereiru to’o fulan-jullu. Bainhira revoltozu sira ataka tiha povoasaun barak ho intuisaun hodi trava avansa governu nian. Revoltadór iha zona balun kontrola nia rikusoin, hahán no karau iha foho tutun aas liuliu iha área Kablaki. Konfigurasaun rai no grupu rebelde oioin, sai difikuldade ida ba forsa governu portugés ne'ebé avansa ba Kablaki husi frente tolu. Parte leste ho arraia sira komanda hosi kapitaun José Faure da Rosa, hosi oeste komanda husi António Valente de Almeida no husi zona norte komanda husi governadór Filomeno da Câmara rasik. Iha fulan-fevereiru funu namkari hosi Maubisse no Soibada. Governadór rasik avansa ba rejiaun Manukate, Hatobessi, Maulau, Lekidoe no Turiskai. Revoltozu sira momentu ne'e domina tiha povoasaun Tumau no Hatobessi, lori mós balada haki'ak hanesan bibi, kuda no karau. Basá forsa portugés superiór liu iha kilat, halo revoltozu sira tenke hakiduk no husik balada barak. Nune'e moradór sira kaer karau 112 no kuda lubun.[11]
 
Maibé iha fulan-marsu tinan 1912, funu mós habelar tan ba territóriu balu iha Timor-Leste . Forsa portugés labele konsentra loos ba funu Manufahi. Iha Oekusi, loron 22 fulan-marsu, liurai Topasse João da Cruz Hornay ataka tiha guarnizun Pante-Makassar. Governu portugés manda tiha ró Pátria ba Oekusi ho soldadu mosambikanu na'in 40, sarjentu 3, moradór husi Baukau na'in 31 ne'ebé lidera husi tenente infantária Sergio Morais e Castro. Ne'ebé presiza loron rua mak okupa fali Oekusi, liuliu tanba superioridade ho armamentu funu nian, inklui mós bombardeamentu husi kanoñeira ró Pátria.[12]
 
Iha funu Manufahi loron 25 fulan-marsu, kapitaun Faure da Rosa liutiha kombate maka'as ho raan, okupa tiha Fatu-Boe. Iha fulan-abríl okupa Fatuberliu iha rejiaun Leste Same nian. Maibé funu habelar tiha ba Atabae, Kailaku, Atsabe no Leimaun. Ne'ebé governu portugés foin konkista fali iha fulan-abríl. Portantu revoltozu Kailaku sira lakohi rende no deklara di'ak liu mate duké entrega an. Hosi fulan-abríl no fulan-jullu klaran bainhira ró-ahi boot rua tan lori tropa mosambikanu entaun funu hahú ekilibradu no favorável liu portugés sira. Basá utilizasaun artillaria, metralladora, granada no bombardeamentu kanoñeira ró Pátria, hosi zona kosteira, konsege hadau Aitutu ne'ebé forsa barak husi Manufahi halibur. Nune’e revoltozu Manufahi sira kontinua defende no konsolida an iha fortaleza defeza iha Riak no Leolaku.[13]
 
Atu domina Riak presiza loron 40, hodi mina maka foin bele harahun fortifikasaun ne'ebé timoroan harii. Dom Boaventura de Costa de Souto Maior, izoladu tiha depois la simu apoiu husi reinu foun ho ninia ema 12.000 sori an iha Leolaku. Sira halo tranqueira iha laletek leten, ke'e rai kuak iha foho lolon no harii moru husi fatuk. Nune'e dalabarak governadór Filomeno da Câmara hatudu nia admirasaun ba timoroan nia kbiit no mobilidade no mós destreza iha arte funu nian no matenek atu uza materiál funu nian, inklui mós hili no uza fatin ba reforsu sira-nia defeza. Liuliu revoltozu timoroan efetivu liu sai gerrileiru ne'ebé derrepente halo atake no subar lailais.[14]

Konsekuénsia Funu Manufahi

Funu Manufahi halekar ba fatin barak iha Timór-Portugés. To'o fulan-agostu Dom Boaventura nia ema balun sei hetan serku no foin rende an. Iha parte leste funu akontese konsentra iha Kelikai. Portantu iha Oekusi-Ambeno sei iha ataka to'o fulan-maiu 1913. Maibé kuaze funu sira ne’e hotu-hotu ho karaterístika lokál. Nune'e mós funu ne’e hamosu fali asaun tesi-ulun hanesan parte husi funu primitivu nian. Porezemplu timoroan ne'ebé leál ba governu, tesi nia inimigu timoroan ninia ulun iha Atsabe na'in 300 no lori ba hafutar akapamentu Maubisse. Jaime do Inso, ofisiál ró Pátria haktuir bombardeamentu ba Liurai-Feto Betano no asaun halibur ema nia ulun hamate timoroan na'in 1000. Iha Dili, Governadór Filomeno da Câmara fó apoiu ba selebrasaun vitória nian hosi moradór sira hodi halo espozisaun ema nia ulun maka tesi iha funu laran.[15] 
 
Dom Boaventura nu'udar protagonista funu Manufahi  ikusmai deside atu rende liuhosi karta ida ba governadór iha fulan-abríl, depoizde hetan serku semana rua husi portugés sira. Iha loron 18 fulan-jullu governu Portugál hasai ninia postu nu'udar rei-corónel no liurai Manufahi inklui mós hasai ninia aliadu sira nian hanesan liurai Bubursusu – Dom Afonso Perreira, liurai Ulmera – Dom Clementino Perreira, liurai Ermera – Dom Miguel mós lakon ninia postu titulár. Entretantu assimilado sira iha Dili maka deskonfiadu, hetan kaer mak goeza-timorense, Domingos de Sena Barreto, no konspiradór europeu, Dr. Paiva Gomes no Manuel de Sousa Gentil no seluk tan. Dom Boaventura rasik sai dadur to’o mate, maibé laiha informasaun kona-ba ninia mate. Sei misteriozu katak nia mate-isin hakoi iha entrada semitériu Santa Cruz – Dili ka mate iha komarka Aipelu, Batugade ka illa Ataúro.[16]  

Funu husi tinan 1911 ho 1912, rezulta timoroan mate hamutuk na'in 15.000 to'o 20.000 ka liu 5% husi populasaun tempu ne'ebá. Governadór Filomeno da Câmara rasik aproveita manán funu hodi fó sansaun no punisaun. Iha loron 23 fulan-agostu 1912, deside área Raimera, Riak no Leolaku sai tiha rai estadu nian ho naran República. Povu Manufahi mak lakon funu tenke halo serbisu obrigatóriu no feto-faluk arraia ne'ebé mate no ema sira kanek hosi parte governu nian hetan nuu-hun ho xokolate-hun no mós lukru seluk lahó selu impostu. Entretantu populasaun iha zona revoltoza sira tenke kuda nu'u-hun no xokolate-hun no entrega asulear ba halo serbisu. Nune'e timoroan hetan obrigasaun kuda kafé-hun, liuliu hosi tinan 14 to'o 60 halo serbisu obrigatóriu.[17]
 
Ikusliu oinsá timoroan haree ba Revolta Manufahi nu’udar parte husi rezisténsia hasoru koloniál? Pontu importante revolta Manufahi no Dom Boaventura sai asuwa’in iha perspetiva no istoriografia Timor-Leste. Liu-liu sai inspiradór ba nasionalizmu timoroan ne'ebé mosu hosi ASDT – Fretilin (Associação Social Democrata Timorense – Frente Revolucionária de Timor-Leste independente) iha tinan 1974-75. Iha konsellu Seguransa ONU (Organização das Nações Unidas), José Ramos-Horta nu'udar Ministro dos Negócios Estrangeiros husi República Democrática de Timor-Leste (RDTL) iha loron 12 fulan-abríl 1976 hato'o ho orgullozu katak liurai-feto Maria de Manufahi, feto-faluk Dom Boaventura, mak momentu ne'ebá halo tinan 80 nu'udar militante husi partidu ne'ebé nia reprezenta.[18] Entretantu Timor-Leste ukun rasik an tinan 2002, naran Dom Boaventura sai Ordem Combatentes Fundadores de Libertação Nacional,[19] no Revolta Manufahi nia sentenariu sei selebra ho espesiál iha tinan 2012.

Nota de rodapé
[1] Frédéric Durrand. 2009. História de Timor-Leste: Da Pré-História À Actualidade – Istória Timor-Leste Nian: Husi Pre-Istória To’o Atualidade. Lisboa-Porto. Lidel p. 86
[2] Ibid. p. 83, 88.
[3] Geoffrey C. Gunn. 2005. 500 Tahun Timor Lorosae. Dili. Sa’he Institute for Liberation (SIL) & Nagasaky University. p. 275.
[4] Carlos Filipe Ximenes Belo. 2012. A Guerra de Manufahi (1911-1912). Baukau. Tipografia Diocesana. p. 7.
[5] René Pélissier. 2007. Timor em Guerra: A Conquista Portuguesa 1847-1913. Lisboa.Editorial Estampa. p. 367-368. Haree mós Geoffrey Gunn. op.cit. p. 266-268.
[6] Carlos Filipe Ximenes Belo. op.cit. p. 23. Haree mós Documento Secretaria De Estado Da Arte e Cultura. 2012. Liurai Dom Koronel Boaventura da Costa de Sotto Maior, Direcção Nacional do Património Cultural.
[7] Geoffrey Gunn. op.cit. p. 258.
[8] Ibid. p. 261 no haree Carlos Filipe Ximenes Belo. op.cit. p. 9.
[9] Carlos Filipe Ximenes Belo. Ibid. p. 10.
[10] Ibid. p. 12.
[11] Ibid. p. 13.
[12] Ibid. p. 13.
[13] Ibid. p. 15.
[14] Ibid. p. 91.
[15] Ibid. p. 90-91. Haree mós Geoffrey Gunn. op.cit. p. 265.
[16] Geoffrey Gunn. op.cit. 270. Haree mós René Péllisier op.cit. p. 423.
[17] Haree Carlos Filipe Ximenes Belo. P. 23-24.
[18] Geoffrey Gunn. op.cit. 269-271.
[19] Ibid. p. 276.
[20] Decreto Presidente República Democrática de Timor-Leste. No. 53/2007.

Bibliografia

Belo. Carlos Filipe Ximenes. 2012. A Guerra de Manufahi (1911-1912). Baukau. Tipografia Diocesana.
Decreto Presidente República Democrática de Timor-Leste. No. 53/2007.
Documento Secretaria De Estado Da Arte e Cultura. 2012. Liurai Dom Koronel Boaventura da Costa de Sotto Maior, Direcção Nacional do Património Cultural.
Durrand. Frédéric.
2009. História de Timor-Leste: Da Pré-História À Actualidade – Istória Timor-Leste Nian: Husi Pre-Istória To’o atualidade. Lisboa-Porto. Lidel.
Gunn, Geoffrey C. 2005. 500 Tahun Timor Loro Sae. Dili. Sa’he Institute for Liberation (SIL) & Nagasaky University.
Pélissier, René. 2007. Timor em Guerra: A Conquista Portuguesa 1847-1913. Lisboa. Editorial Estampa.